馬可福音: 第1章

馬可福音

第一章

施洗約翰

1 神嘅仔，耶穌基督福音嘅開頭。2 就好似先知以賽亞咁寫：

「睇清楚呀，我要喺你之前派我嘅傳話人去，
佢去準備你條路。
3 喺荒蕪地帶有把聲叫出嚟：
『去準備主嘅路，
整番直佢條路。』」

4 施洗嘅嗰個約翰就嚟咗個荒地，傳講赦罪嘅悔改洗禮。5 成個猶太地區同耶路撒冷嘅人都出嚟去到約翰嗰度，認咗佢哋嘅罪，喺約旦河裏面俾佢施洗。6 約翰係着駱駝毛嘅衫，條腰戴皮帶，食嘅係蝗蟲同野生蜂蜜。7 他傳道嗰陣咁講：「有嗰喺我之後嚟嘅人，佢強過我，我就連烏低幫佢除鞋帶都味夠資格㗎。8 我係用水幫你哋施洗㗎喳，但係佢會用聖靈幫你哋施洗。」

耶穌受洗、受引誘

9 嗰陣時耶穌由加利利嘅拿撒勒嗰度嚟到，喺約旦河俾約翰施洗。10 佢一喺水裏邊上嚟就見到嗰天裂開咗，聖靈好似隻鴿咁落喺佢嗰度。11 跟住有把聲喺天上邊嗰度嚟：「你係我好錫嘅仔，我對住你好開心呀。」

12 之後聖靈就將耶穌趕到去個荒地。13 佢喺荒地嗰度四十日，俾撒但引誘，而且佢又同埋啲野獸一齊，又有啲天使服事佢。

耶穌喺加利利

14 約翰俾人拉咗之後，耶穌嚟到加利利傳神嘅福音，15 就話喇：「時候就到喇，神嘅國就快嚟到㗎喇。悔改、信福音啦！」

16 耶穌經過加利利嘅海邊，見到西門同西門嘅兄弟安得烈放漁網落海（因為佢哋係漁夫）。17 耶穌就同佢哋講：「嚟跟我啦，我會令到你哋做捉人的漁夫！」18 佢哋就即刻連漁網都唔要，跟咗佢走。

19 耶穌行前啲，又見到西庇太嘅仔雅各同雅各嘅兄弟約翰喺船上面補緊個網。20 耶穌即刻叫佢哋，佢哋就將阿爸西庇太同啲工人留喺船上面，之後就跟咗耶穌。

污鬼上身嘅人

21 佢哋去到迦百農，喺安息日，耶穌就即刻入去會堂教人嘢。22 大家都對佢教嘅嘢好詫異，因為佢自己好有權威，唔似嗰啲律例專家咁樣。

23 嗰陣喺會堂嗰度，有個人俾隻污鬼上咗身，佢喺度大叫：24 「拿撒勒嗰個耶穌，我哋同你冇挐冇掕喎？你嚟毀滅我哋呀？我知你係邊個呀，咪就係神嘅聖者囉！」25 但係耶穌鬧佢：「收聲！喺佢度出番嚟！」26 污鬼搞到嗰個人抽筋同埋大叫，跟住就出咗嚟。27 大家都好驚，所以就互相問大家：「發生乜事呀？係啲權威嘅新道理喎！連佢命令嘅嗰啲污鬼都聽佢話。」28 就係咁，耶穌嘅消息就傳哂去成個加利利嘅地區嘞。

醫病、傳道

29 佢哋一走出會堂，就同埋雅各同約翰，去咗西門同安得烈嘅屋企。30 西門嘅外母病咗，發燒、瞓咗响度，佢哋就即刻話畀耶穌聽。31 耶穌嚟到，輕輕拉住佢嘅手，扶佢起身，佢就退咗燒。佢就開始去服事佢哋。

32 到咗夜晚日落之後，佢哋帶哂啲病咗同埋鬼上身嘅人嚟揾佢，33 全個城嘅人都聚哂喺門口。34 耶穌醫好咗好多患咗唔同病嘅人，又驅趕咗好多魔鬼出嚟，但係佢唔准啲鬼講嘢，因為連啲鬼都識佢。

35 第朝天未光，耶穌就起身，自己去咗個荒地，喺嗰度祈禱。36 西門同啲拍檔去揾佢，37 揾到佢就同佢講：「個個都猛咁揾緊你。」38 耶穌答佢哋：「我哋一齊去第度，去隔離啲村，咁我就都可以喺嗰度傳道；我嚟就係為咗咁做㗎喇。」39 就係咁，佢去哂加利利嘅嗰啲會堂去傳道同埋驅魔。

醫生痲瘋嘅人

40 有次有個生痳瘋嘅人嚟跪低囈耶穌，佢話：「你如果肯，就可以令到我變番乾淨。」41 耶穌起咗同情心，就伸隻手去摸佢，然後話：「我肯。你乾淨哂㗎喇！」42 嗰個生痲瘋嘅人即刻走開，咁佢就乾淨哂。43 耶穌警告佢，仲要即刻趕佢走，44 對住他講：「你千祈唔好同任何人講呀，但係你要去揾祭司，俾佢睇吓你個身，仲要因為你乾淨哂就要跟住摩西嘅規定捐獻祭物，用嚟畀證據佢哋睇。」45 但係佢出咗去就四周圍公開講，揚開哂呢件事，搞到耶穌以後唔可以公開行入城，唯有留喺出面偏遠嘅地方，而大家仍然繼續由周圍嘅地方走過嚟揾佢。

譯註(2023年10月)

[參考書列表]

1 平行經文：太3:1–12；可1:1–4；路3:1–18；約1:19–28。τοῦ εὐαγγελίου ᾿Ιησοῦ Χριστοῦ可指基督傳的福音(比照：某某傳的訊息)，或基督之福音(指福音的主題就是基督)。NET指這可能是故意語帶雙關。翻譯為「耶穌基督福音」可保存雙關語。至於「神嘅仔」未能像原文般放在「基督」後面 (即類似英文句式 “… Jesus Christ, Son of God”)，主要是因為粵語文法原因；所以只能放在最前。
2 瑪3:1。
3 賽40:3。
4 βαπτίζων與馬太、路加的βαπτίστης不同[NET]，所以馬太譯作「施洗約翰」(比照：陳大文律師)，馬可譯作「施洗嘅嗰個約翰」(比照：做律師嘅嗰個陳大文)。
6 ἔσθων是現在時態分詞(present participle) [Yap]，所以不譯作「食緊」。
7 ἰσχυρότερός指能力更強大，但如果由約翰口中說出，似暗指約翰自己的能力也頗強大，與原文約翰謙遜的語氣不配合；因此譯作較簡潔的「強過我」。κύψας可譯俯身、彎腰，但省略「身、腰」等名詞會更貼切。官話白話文難以省略名詞，但粵語可以只用「烏低」而無須用「烏低身」。
9 平行經文：太3:13–17；可1:9–11；路3:21–22。
12 平行經文：太4:1–11；可1:12–13；路4:1–13。
14 平行經文：太4:12–17；可1:14–15；路4:14–15。παραδοθῆναι意思較廣，此句沒有詳情，不宜譯作「下監」。
16 平行經文：太4:18–22；可16–20；路5:1–11。
21 平行經文：可1:21–28；路4:31–37。
22 「文士」泛指有文才的人(例：三國演義：66回)，意譯摩西律例的專家較準確。
24 NET指τίἡ μῖν καὶ σοί是俗語或口頭慣用語，本身是提問句，所以譯作同類的粵語慣用語「冇挐冇掕喎？」
29 平衡經文：太8:14–17；可1:28–34；路4:38–41。
30 「話畀耶穌聽」，原文沒有「耶穌」，只有代詞。
34 有抄本多了Χριστὸν εἶναι，也有其他抄本有其他字。NET指多出的字似屬後加，這裏依賴NET的意見。
35 平衡經文：可1:35–39；路4:42–44。
40 平衡經文：太8:1–4；可1:40–45；路5:12–16。
41 NET指耶穌ὀργισθείς(憤怒)的抄本可能比一些指耶穌σπλαγχνισθείς(憐憫)的抄本更可靠。但由於未有定論，暫時依大多數譯本的選擇，即後者。